The Alien - Help Select
الثلاثاء, يونيو 03, 2008

ازاي تشتغلي عريسك في فترة الخطوية

ازاي تاكلي عريسك في فتره الخطوبه (كوميدي)

---------------------------------------------------

آنستي العزيزة.. لو ربنا آراد.. واتخطبتي.. فإليكِ نصائحي

حتى تأخذي بخطيبك من مركب الخطوبة إلِّي محدش عارف

هاترسى على إيه .. إلى مثوااااه الأخير في قفص النسانيس


قصدي قفص الزوجية السعيد ..


أجمل ما في الخطوبة العزومات الرومانسية.. على أحلى محلات

أكل في البلد.. واللي عمرك مانتي شايفاها بعد الجواز .. المهم

نصائحي لك عند أي عزومة مع خطيبك.. إنت محتاجه شوية حركات نص كم




1 -الأول لازم تعرفي إن الشوكة والسكينة بيتمسكوا من إيديهم من

الطرف يعني مش من الوسط ولا من البوز زي الخنجر ولا من فوق طبعًااا



2 -العيش أوعي تفضحينا وتقطعيه بسنانك.. ولا الرغيف نصين بإيدك

وكلي نص لقمة وتحشري.. أوعي..

العيش بيتقطع بالسكينة في الطبق.. وبعدين تاخدي لقمة.. لقمة .. بالعافية.. قال يعني نفسك

مسدودة.. اضغطي على أعصابك جدااا وبعدين لما تروَّحي.. إبقي

لوغي زي ماانتِي عايزة



3 -الشوووربة.. أبوس إيدك.. بند الشوربة ده مهم جدًاااا

الشوربة تتشِرب من غير صوت خالص.. ومن غير ماتقعدي تنفخي

فيها.. زي القهوجي اللي بينفخ في الحجر للزبون.. وطبعًاااااا عايزِك

تنسي تمامًا.. السلطانية اللي بتلصقيها على بقك في البيت

وتدلقي على روحك .. بالمعلقة وبدون صوت.. سخنة, ولعة , برضه من غير صوت

وتسيبي تلت الطبق عالأقل.. مش تميليه.. عشان تلهطيها لآخر نقطة



4 -الرز طبعاً .. بيتّاكل بالشوكة.. أوعي إيدك تتمد على المعلقة

وتغرفي من طبق الرز وتعبّي.. إوعي.. الرز بالشوكة.. وكإنك

بتبوسيه مش بتاكليه




5-المكرونة.. الاسباجتي.. برضه بالشوكة.. تتلف على طرف

الشوكة.. لحد ما تخلص وبعدين تحطيها في بؤك من سكات.. مش

تشفطي المكرونة عود عود و تفضحينا




6 -السمك.. آه من السمك مشكلة.. شوفي.. بتفصلي اللحم عن الشوك

إزاي..؟؟ تقطعي اللحم من النص.. بالطول وبعدين تفردي اللحم على

الجانبين ولما تخلصي ناحية.. متقلبيش السمكة.. بلاش فلاحه

شيلي السلسلة بالشوكة والسكينة وحطيها في جنب الطبق

وكملي أكل النص التاني.. وبدل الفيلم الهندي ده.. نصيحة


ماتكليش السمك خالص.. قولي مابحبش السمك وخلصي نفسك



7 -الجمبري.. -إذا كنتِ عارفاه-.. أول ماطبق الجمبري ينزل.. بصيله

بقرف واحتقار شديدين.. آل يعني زهقانة من كتر أكل الجمبري

الجامبو في بيت بابّااااا.. واتنهّدي جامد وقولي.. برضه..؟؟؟ وتروحي

قاطعة راس الجمبريّاية.. بالشوكة.. أنا في عرضك إنسي

المصمصة دلوقتي



8 -البطاطس سواء مسلوقة أو محمرة.. أوعي تهرسيها وتدبيها على
الرز وتدّي ...لا..لآ...لآ...بالشوكة حتة حتة وإنت زي ما تكوني
هاتعيطي من كتر ما البطاطس صعبانة عليكي



9-الفاكهة.. لو الفاكهة فيها بزر.. طلعيه من بؤك بالراحة وحطيه في
إيدك وهي مقفولة.. وبعدين في طفاية السجاير اللي ع الترابيزة

أوعي ياحبيبتي من نظام التفتفة للبزر.. إنسي




10 -ولما تخلّصي أكل تحطي إيدك على بطنك.. -اللي عصافيرها

بتصوصو من العينات اللي كلتيها-.. وتقولي له مش ممكن.. أنا

عمري ما اتفجعت كده.. أنا قدامي أسبوع.. هابطّل أكل فيه

وبعدين تمسكي الفوطة اللي دايمًا موجودة على التربيزة من غير

لزمة.. وتبوسيها.. آل يعني بتمسحي بؤّك

وبعدين تستأذني منه تعملي ماكياجك.. وتخشي التواليت

وتطلعي من شنطة إيديك.. لفة الفول والطعمية اللي جايباها

معاكي و إديها أكل .. وبالهنا والشفاااااااااا



يا دي النيلة كل ده يحصل على العشا وليه القلق دا كله ما بلاشي من الدعوة كلها

ما لوا كوزين الذره على الكورنيش و لا أحلى منه و مافيهوش العقد دي

وربنا يجيب العواقب سليمه لحد ما تخلص فترة الخطوبه و ندبس بقى








6 التعليقات :

  1. ياعم اديلها جوز جنيهات وتطفح اللى عايزاه وخلاص بلا وجع دماغ

    ردحذف
  2. ياعم كل دا ليه اديلها جوز جنيهات تجيب اللى عايزاه وتفرح

    ردحذف
  3. ههههههههههههههههههههههههههههههههههههه
    بجد جااااااااااااامد
    انتم بتجيبو الحاجات الجامده دى منين

    ردحذف
  4. يعم بلا وجع دماغ خلية تشرب اشربة زى الجمو سة هيتسلة شوية وهيسيبة

    ردحذف
  5. هههههههههههههههههههههه بجد جامدة بس المخطوبين فى الفترة دى بيبقوا رومانسيين لوحدهم من غير توصيات لحد ما تقع الفاس فى الراس

    ردحذف
  6. هو الطبيعى بياكلوا بالمعلقه وبلاش حركات وكله ده بيكون بس فى فتره الخطوبه وبيحصل عكسه بعد الجواز

    ردحذف

للتعليق علي الموضوع او اي استفسار اكتب التعليق وعند الانتهاء من كتابة التعليق اضغط علي كلمة كتابة التعليق

نجوم اف ام Nogoom FM 100.6
مرحبا بكم في الموقع غير الرسمي لاذاعة نجوم اف ام .. اسمع الاذاعة مباشرة بدون برامج بالاضافة للاذاعات الاخرى راديو روتانا وراديو صوتكم وراديو ميلودي وبرنامج انا والنجوم وهواك للمذيع اللامع اسامه منير كل يوم أحد وثلاثاء الساعه 12 بعد منتصف الليل وتمتع بالعديد من وسائل الترفيه الاخرى ...، ملحوظة : الموقع ليس له صلة باي شخص باذاعة نجوم اف ام Welcome to Ngoum FM Unofficial Blog, Listen live to Nogoom Fm and other Radio Stations

اصدقاء الموقع


 


تابعنا عبر الجوجل بلس :

تابعنا عبر الفيس بوك:

ليصل جديدنا إلى بريدك تفضل بالاشتراك